اليوم العالمي للبيئة……
وسائل النقل كثرات
حتى المصانع و الشركات
وتسببات في تلوثات
الناس مرضات
التجات للسبيطارات
المصحات كلها عمرات
والحل ابعاد المصانع على البنايات
وانتاج الطاقة الكهربائية للتخلص من الغازات
الشوارع توسخات
والقوادس تسدات
المدينة كتعرف إصلاحات
ومواكبة التطورات
ولكن مع كثرة النفايات
اتشكلت حكايات…
ومكتحصاش الشكايات….
الصين معروفين بالزلازيل و البراكين
وفي ازدهار ابلادهم ديما طامحين
بالعولمة مزداهرين
وراهم دابا متقدمين
ولقلة النفايات داركين
في حياتهم منظمين ……
بلادنا مناخها زوين
من الكوارث الطبيعية مهنيين
غير الثلوت باش مخنوقين
ونقدروا نتهناو من الافة في الحين
خاص غير الضمير ونكونوا بالعلم مسلحين
ناخدوا الاجابيات من بلاد الصين
راهم باعادة التصنيع معروفين
كل اسرة تبدا مع وليداتها في الحين
ولا تعممت تاكدوا اننا ناجحين
ناخدوا مثلا القارورات
تشرب ماها وتصنع بيها ديكورات
وريدات دير فيها شميهات
وبزيطمات كتفرح لوليدات
وبها يتعلموا يجمعوا فليسات
خاص غير تخدم لعقل وبعض الاستراتيجيات
بحال كانيطات المونادات
واخا من نفايات نصنعوا بها فازات
وحتى البلاستيكات تصنع بيها وريدات
وقشور اللبيض نزينوا بيه قنينات
وعويدات بولوا تعطينا فيوزات
خاص نتعلموا ونعلموا وليداتنا التقنيات
لي غتولي عندنا عادات
وغنصنعوا بزاااف الحاجات
وغنتخلصوا من مشكل النفايات….
- عائشة بن الشيخ
